PESUM DEIVAM

 

பேசும் தெய்வம் -   நங்கநல்லூர்   J K SIVAN

51.  இரு  ஆத்மாக்களின் சங்கமம்.

1927  முடிவில்  நமது தேசமெங்கும்  ஒரு  புத்துணர்ச்சி.  இந்தியா சுதந்திரம் பெற வேண்டும். எப்பாடு பட்டாவது  அதை  அடைந்தே தீருவோம். அமைதி வழி, அஹிம்சா வழியில்  மட்டுமே  என்ற  காந்திஜியின்  பின்னால் நாடு முழுதும்  தொண்டர்கள்.   டிவி,  போட்டோ கவரேஜ்,  வீடியோ,  மீடியா, பேனர்,  கட்  அவுட்  என்று  எதுவுமே   தெரியாத  காலம்.   காந்தி நாடு முழுதும்  ரயிலில் மூணாம்  கிளாஸில்  தான் பிரயாணித்தார்.  

மஹாத்மா காந்தி தென்னிந்தியாவுக்கு  சூறாவளி சுற்றுப்பயணம் செய்து   காங்கிரஸ்  தேர்தலில் ஈடுபட்டு அதற்கு ஆதரவு தேடிக்கொண்டிருந்த சமயம்.   1927 கடைசியில்  கேரளாவுக்கு  வந்தார். அவர் இருந்த பகுதிக்கு  அருகே  தான் எங்கேயோ  மஹா பெரியவாவும் அந்த சமயம் கேரளாவில் இருக்கிறார் என்று அறிந்தார்.  ஏற்கனேவே  ஹிந்து  பத்திரிக்கை  ஆசிரியர்  A  ரங்கசாமி ஐயங்கார் மூலமாக,   தமிழ்நாடு காங்கிரஸ் தலைவர்   S . சத்யமூர்த்தி  மூலமாக  மஹா பெரியவாவின் எளிமை, அருமையான எண்ணங்கள், பக்தி,  ஜாதி மதம் பாராமல் எல்லா  மக்களிடமும் அன்பு  எல்லாம் பற்றி நிறைய கேள்விப்பட்டிருந்தார்.  .

அப்போது  மஹா பெரியவா கேரளாவில் இருந்தார்.  பாலக்காட்டில் நெல்லிச்சேரியில்  கேம்ப்.  

இந்த சந்தர்ப்பத்தை  விடாமல்  எப்படியாவது  மஹா பெரியவாளை தரிசிக்க வேண்டும் என்று மஹாத்மா காந்தி விரும்பினார். 

அருகில் இருந்தவர்களிடம்  '' இந்த  பிரதேசத்தில் காஞ்சிபுரம்  மட  சங்கராச்சர்யார்  வந்திருக்கி றார்  என்கிறார்களே, அவரை நான்  பார்க்கவேண்டும்''   என்ற  ஆர்வத்தை  தெரிவித்தார்.

விசாரித்ததில்  அப்போது  பாலக்காடு   விஜய  யாத்ரையில் காஞ்சி  மஹா பெரியவா   நெல்லிச்செரி என்கிற  ஊரில்  தங்கியிருக்கிறார்  என்று அறிந்தார்.

 காந்திஜி  பாலக் காட்டில் நெல்லிச்செரி சென்றநாள்  15.10.1927.

''இங்கே  காஞ்சி  பரமாச்சார்யர் எங்கே  தங்கியிருக்கிறார்?''

''பாபுஜி  அவர் அதோ  அந்த  மாட்டுத்  தொழுவத்தில் தான்  வாசம் பண்ணுகிறார்''

''மாட்டுத்  தொழுவத்திலா?  ஜகத்  குருவா?''  

''அவர்  எங்கும்  இது  போன்ற  இடத்தில்  தான்  தங்குகிற சந்நியாசி''
பசுமாட்டுத்  தொழுவத்தில்  வாசலில்  பெரிய  கும்பல் சேர்ந்துவிட்டது.  
வாசலில்  மஹாத்மா  காந்தி வந்திருக்கிறார் என்ற விஷயம்  உள்ளே  இருந்த பெரியவாளுக்கு சென்றதும் வாசல் வந்து  நின்ற  மகாத்மாவை பரமாச்சாரியார்  வெளியே வந்து வரவேற்றார்.   காந்திக்கு  இது  ஒரு  புது அனுபவம்.  

காவி   கதர் பருத்தி  ஆடையில்  ஆதி சங்கரரின் வாரிசாக,   மாலை  வெயிலில்  முகம்  பொன்னிற மாக  ஜொலிக்க  புன்னகை  அணிந்து நின்ற  சிறிய உருவம்  காந்திஜி யை ஒரு  கலக்கு கலக்கியது.  உருகிப்  போய் விட்டார்.  இரு கரங்களும்   தானாகவே உயர்ந்தன. கூப்பின.

அவற்றின் பக்தி த்வனி அலாதியாக  வெளிப்பட்டது,  பேச்சின்றி.  பேச்சுக்கு அப்பாற்பட்ட ஒரு ஆனந்தானுபவம்  காந்திக்கு .    
 
மஹா பெரியவாளுக்கு  இந்த  மஹா புருஷன், நமது  பாரத தேசம்  செய்த புண்யத்தால்  தோன்றிய ,  வெகு எளிமையின் சின்னமாக, சத்ய ஸ்வரூ பமாக நாட்டின் சுதந்திர  விழிப்பின்  தலைவன்,     இந்த மாபெரும்  தேசத்தில் ஒரு  ஏழை விவசாயியின்  கோலத்தைக்  கொண்டவ

ரைச்  சந்தித்ததில்  மஹா பெரியவாளுக்கும் மட்டற்ற  மகிழ்ச்சி.  

 
மகாத்மாவுக்கோ தெய்வீகத்தின், தெய்வத்தின், வேதகால உருவாக காட்சியளிக்கும் ஒரு  பரமாச் சார்யரை  சந்தித்ததில் ஆனந்தம்.  

''தாங்கள் அமர வேண்டும்'' என்றார்  மஹா பெரியவா ஆங்கிலத்தில்.

தனது மதிப்பையும்  மரியாதையும்  வணக்கத்தையும் காந்திஜி   ஆச்சர்யருக்கு  தலை குனிந்து  மனப்பூர்வமாக  அளித்தார். அவரும் பெற்றுக்கொண்டார். அவர் அருகிலேயே காந்திஜி தரையில் அமர்ந்தார்.  சுற்றியிருந்தோர் அமைதியாக  தூரத்தில்   வெளியில்  நின்றுகொண்டு  இந்த அற்புதத்தை கண்ணாரக்  கண்டு ஆனந்தித்தனர்.
   
நிசப்தத்தில்  பரிபூர்ண  அமைதியில் இரு  உயர்ந்த  உள்ளங்கள் கலந்தன.  ஒன்றின.  சில நிமிஷ  ஆன்ம விசாரத்திற்குப்  பிறகு, சம்பாஷணை   துவங்கியது.

''ஸம்ஸ்க்ரிதத்திலேயே  பேசுவோமா?'' என்றார்  மஹா பெரியவா .

''நீங்கள்  ஸம்ஸ்க்ரிதத்திலேயே   பேசுங்கள்.  நான்  புரிந்துகொள்ள முடியும்.  நான்  ஹிந்தியில்  பதில் சொல்கிறேனே.'' என்றார்  தேச பிதா.

''ஆஹா,  அப்படியே  பேசுவோமே. எனக்கும்  அந்த பாஷையில்  நீங்கள்  பேசுவது  புரிந்து கொள்ள முடியும்.''

மூன்றாம்  மனிதர்  ஒருவர்  இல்லாமல்  இரு மனித  ரூப  தெய்வங்களும்  ஒரு மணி நேரத்துக்கும்  மேலாக  சம்பாஷித்தனர்.  இன்று  வரை  என்ன பேசினார்கள்  இருவரும்  என்று  ஒருவருக்கும்  தெரியாது.

காந்திஜியோடு  உடன்  வந்திருந்த  ராஜாஜி  வெளியே  மற்றவர்களோடு சேர்ந்து   நின்று கொண்டிருந்தார்.   மாலை நேரம்  6 மணியாகப் போகிறது.  காந்திஜி  இரவு  உணவு  அருந்தும்  நேரம்  அது.  6 மணிக்குப்  பின்  அவர்  எந்த  உணவும்  அருந்த மாட்டாரே.   ராஜாஜிக்கு  கவலை.மாலை ஆறு   மணிக்கு சில  நிமிஷங்கள்  முன்பு  மாட்டுத்  தொழுவத்திற்குள்  நுழைந்தார்.  இருவரையும்  வணங்கிவிட்டு  

''பாபுஜி,   நீங்கள்  உணவு  அருந்தும்  நேரம்''  என்று  நினைவூட்டினார்.
கைகளை  உயர்த்தி,  ''நிறுத்து''    என்ற  சைகையில்  காந்திஜி  ராஜாஜியிடம்  காட்டி விட்டு,

 ''இந்த  மகானோடு  நான்  அனுபவித்த  சம்பாஷணையே   எனது  இன்றைய  உணவு.   உள்ளம்  வயிறு  இரண்டும் நிரம்பியிருக்கிறதே''  என்றார்,.

''சுவாமிஜி  நான்  விடைபெறுகிறேன்  நன்றி''

''எனக்கும்  ரொம்ப  சந்தோஷம்.  இந்தாருங்கள்'' .  ஒரு  பொன்னிற  ஆரஞ்சு பழத்தை   நீட்டினார்  மஹா பெரியவா..

''எனக்கு  ஆரஞ்சு  ரொம்ப  பிடிக்கும்.   மீண்டும் நன்றி''  என்று  புன்னகையோடு  பெற்றுக் கொண்டு சென்றார்  காந்திஜி.
 
அன்று  கோயம்பத்தூரில் ஒரு கூட்டம். காந்திஜி-மஹா  பெரியவா  என்ன  பேசினார்கள்  என்று  நிறைய பேர்  ஆவலாக  கேட்டதற்கு  தேச பிதா  கூட்டத்தில்  சொன்னது:   '' இது உண்மையிலேயே  எனக்கு  ஆன்ம திருப்தி அளித்த  ஒரு  சந்திப்பு.  எனது எத்தனையோ  கேள்விகளுக்கு ஜகத் குருவிடமிருந்து  விடை கிடைத்தது''
 
பல வருஷங்களுக்கு  அப்புறம், 1968ல் நவம்பர்  மாதம்  ஒரு  விழாவில்  மஹா  பெரியவாளிடம்  சிலர்  நீங்கள் மகாத்மாவோடு  கேரளாவில் நெல்லிச்சேரியில்  சந்தித்து  பேசியது  பற்றி  சொல்லுங்கள்  என்று  கேட்டார்கள்.

'' காந்திஜி  பாலக்காடு  வருவதற்கு  சில  நாட்கள்  முன்பு கொல்லப்பட்ட ஒரு  ஆர்ய சமாஜ்  துறவி  சுவாமி  ஸ்ரத்தானந்தாவைப்  பற்றி பேச்சு வந்தது. அப்போது காந்திஜி   இத்தகைய சம்பவங்கள்  எதிர்காலத்திலும்  நேரிடலாம். கொலையாளிகள்  மீது  எனக்கு  எக்காலத்திலும்  வெறுப்போ,

கோபமோ  பகை உணர்ச்சியோ தோன்றாமல் அவர்களை  அன்போடு  அணைக்க எண்ணம்  உருவாக வேண்டும் என்பது என் வேண்டுதல் சுவாமி. இதைபெற  நான்  முயற்சிப்பேன் ''  என்று  கூறினார்.  அவ்வாறே தான்  1948 ஜனவரி 30 அன்று நடந்தது''

 பரமாச்சார்யர்  தொடர்ந்தார்.  ''இந்த 'பூலோகத்தில்  இப்படி ஒரு  அபூர்வமான பகைவனுக்கும்  அருள்வதற்கு  நெஞ்சம்  வேண்டும்'' என்று பாரதியார் வாக்குக்கு  உதாரணமாக திகழ்ந்தவர்  மஹாத்மா காந்தி '' என்று  தோன்றியது.  சத்தியத்தை கடைப்பிடித்தவர்  ஒருவரை  சந்திப்பது அரிது '' என்றார் .

தொடரும்