GEETHAGOVINDHAM

கீத  கோவிந்தம் 

ஜெயதேவர் 

                                                 

                     ராதா,   நீ   யாரம்மா?

                                                                                

ஜெயதேவரின்  கீத கோவிந்தம் எனும் அஷ்டபதி  ஸ்லோகங்களைப் பற்றி  பேசுவதற்கு  முன்பு கட்டாயம்  ராதவைப் பற்றி தெரிந்திருக்க வேண்டும்.   ராதாவை அறியாமல் கிருஷ்ணனையோ  கீதகோவிந்தத்தையோ அறிய முயல்வது   எங்கோ ஒரு ஊருக்கு போவதற்கு  பதிலாக வேறு ஏதோ ஒரு ரயில் வண்டியில் ஏறி பிரயாணம் பண்ணுவது போல் ஆகிவிடும். பலனே  இல்லை. .

அவளுக்கு எத்தனையோ பெயர்கள்.ராதா, ராதிகா, ராதா ராணி, ராதிகா ராணி. கிருஷ்ணனுக்கு பிரியமானவளுக்கு கிருஷ்ணனைப்போல் பல பெயர்கள் இருந்ததில் ஆச்சர்யம் என்ன இருக்கிறது?  . வல்லப, கௌடிய வைஷ்ணவ சம்பிரதாயத்தில் அவள் சக்தி ஸ்வரூபம். நிம்பர்கா வகுப்பினர் ராதாவும் கிரிஷ்ணனும் சத்யத்தின் உருவகம் என்று வழிபடுகிறார்கள். என்னவோ தெரியவில்லை, மகாபாரதத்திலோ, விஷ்ணு புராணத்திலோ, ஹரிவம்சத்திலோ, பாகவத புராணத்திலோ, ராதவைப் பற்றி அறியமுடியவில்லை. ஆனால் பிரம்ம வைவர்த்த புராணம், கர்க சம்ஹிதை, ப்ருஹத் கெளதமிய தந்த்ரா, போன்றவை ராதாவைப் பற்றியும் கிருஷ்ணனுடன் அவள் உறவு பற்றியும் பேசுகின்றன. ராதை. 

நாம் அறிந்துகொள்ளவேண்டியது  ராதா ஒரு முக்ய கோபி.   கிருஷ்ணன் இள வயதில் பல கோபியருடன் பிருந்தாவனத்தில் களித்து வாழ்ந்தான் வளர்ந்தான் என்று அறிகிறோம் அதில் முக்ய கோபி ராதா. பன்னிரண்டு வயதில் குருகுலத்துக்கு கிருஷ்ணன் சென்றான். பத்து வயது ஏழு மாதம் நிரம்பிய பாலகனாய் கிருஷ்ணன் மதுராவிற்கு சென்றான் என்று எல்லாம் அறியும்போது எங்கோ வயதில் தவறு இருக்க ஏதுவாகிறது. கிருஷ்ணனை விட ராதா பன்னிரண்டு வயதுபெரியவள் என்று கூட சொல்கிறார்கள்.

கீத கோவிந்தம் ராதாவைப் பற்றி நிறைய பாடுகிறது. ராதாவை கிருஷ்ணன் மனைவியாக பாரதத்திலோ பாகவதத்திலோ அறிய முடியவில்லை. நிம்பர்கா ஆச்சாரியார், ஜெயதேவர் மூலமாகவே ராதாவை நன்றாக கேட்டு படித்து களிக்கிறோம். 

நமக்கு தெரிந்தது ராதை கிருஷ்ணனின் நண்பி. பக்தை. விஸ்வாசி, ஆலோசகி. மற்ற கோபியர் அவளது தோழிகள். நாம் பாகவத ஸ்கந்த புராணத்தில் தெரிந்து கொள்வது கிருஷ்ணனுக்கு கணக்கற்ற பக்தைகள். அவர்களில் 16000 பேர் அறியப்பட்டவர்கள். 108 பேர் முக்யமானவர்கள். அவர்களில் 8 பேர் பட்ட மகிஷிகள். கிருஷ்ணனின் கோபியர் அனைவரிலும் பிரதானமானவள் ராதா. மிகவும் நெருக்கமானவள் ருக்மிணியா ராதாவா என்றால் கிருஷ்ணனுக்கு ராதை தான். எல்லா கோபியரும் லக்ஷ்மி அம்சம் தான். ராதா- கிருஷ்ணன் உறவு இருவகை. ஸ்வகீய ரசம், (நெருங்கிய உறவு) மற்றது பரகீய ரசம் (உள்ளத்தின் உறவு) சைதன்யரின் பக்தி     ராதா -கிருஷ்ணனின் இதய பூர்வ - உள்ள உறவு ஒன்றிலேயே லயித்து அது உயர்ந்த அன்பு என்பதே. தனித்திருந்தாலும் சேர்ந்திருந்தவர்கள் அவர்கள். எண்ணத்தால் ஒன்றானவர்கள். கோபியர் கண்ணனிடம் கொண்ட காதல் உத்தம மன நிறைவான காதல் ஒன்றே. உடல் சம்பந்த பட்டது அல்ல. மனதில் ஊற்றாக வெள்ளமாக ஊறிய காதல்.  இதற்கு பிரேமை என்று பெயர். 

ராதா யார்? வ்ரிஷபானு என்கிறவர் அவரது பூர்வ ஜன்மத்தில் ராஜா சுச்சந்திரா வாக இருந்தார். அவருக்கும் அவர் மனைவி கலாவதிக்கும் பிரம்மா கொடுத்த வரத்தின் பயனாக த்வாபர யுகத்தில் லக்ஷ்மி தேவியே பெண்ணாக அவதரித்தாள். அவளே ராதா.கலாவதி ராணியே வ்ரிஷ பானுவின் மனைவி கீர்த்தி குமாரி . 

ராதை குழந்தையாக இருக்கும்போது நாரதர் அவளைப் பார்க்க வந்தபோது வ்ரிஷபானுவிடம் என்ன சொன்னார் தெரியுமா? 

'' இந்த குழந்தை சாதாரணம் இல்லை. லக்ஷ்மிதேவியே . தாயாராகவே இவளை வளர்த்து வா. இவள் காலடி பட்ட இடம் நாராயணன் இருக்குமிடம். அவரே கிருஷ்ணன் என அறிவாய். '' வ்ரிஷபானுவிடம் ராதை அவ்வாறே வளர்ந்தாள்.